BANGSALAN NEW WENGKER

(Sumber:http://almadura.wordpress.com/2009/01/31/bangsalan-9/)
Bangsalan 9






Rate This


9:1 Hekmat la maddek bengkona, ban masang canggana se papetto’.
9:2 La nyambelli ebin ekapesta’a, ngola aeng anggur sarta nyadhiya’agi ka’-angka’.
9:3 Reng-bareng babine’an esoro entar ra’-era’an dhari kennengngan se gi-tenggi e kottha,
9:4 “Sapa se ta’ andhi’ pangalaman, mara dha’ enna’!” Ka se ta’ andhi’ akkal buddi, hekmat ngoca’,
9:5 “Mara rassae kobassana tang kakanan ban cepcep anggur se eola sengko’ reya.
9:6 Dina’agi kabudhuwan, me’ olle ba’na odhi’ senneng. Toro’ jalanna oreng se penter.”
9:7 Mon oreng se ta’ endha’ eajari bi’ ba’na ebalai kasala’anna, tanto ba’na ekala’-gella’ bi’ oreng jareya. Mon ba’na gigir ka oreng jahat, tanto ba’na eca’-koca’e.
9:8 Ja’ nyale oreng se ta’ endha’ eajari, dhaggi’ ba’na ekabaji’i bi’ oreng jareya. Tape mon oreng se bicaksana bi’ ba’na eduduwi kasala’anna, ba’na tanto eargai bi’ oreng jareya.
9:9 Mon oreng se bicaksana bi’ ba’na ela-balai, oreng jareya tanto sajan bicaksana. Ban mon oreng se ta’at ka Allah bi’ ba’na eajari, pangataowanna tanto sajan atamba.
9:10 Mon terro bicaksana’a, dha’-adha’na oreng kodu andhi’ ate hormat ban tako’ ka PANGERAN. Mon ba’na tao ka Se Mahasocce, ba’na tanto andhi’ pangarteyan.
9:11 Hekmat bakal malanjanga omorra ba’na.
9:12 Mon ba’na andhi’ hekmat, ba’na dibi’ se ontong. Tape mon ba’na nolak hekmat, ba’na dibi’ keya se bakal rogiya.
9:13 Kabudhuwan reya akantha babine’ se careme se ta’ andhi’ pangalaman ban ta’ tao todhus.
9:14 Kennengnganna e labangnga bengkona otabana e labang sakethengnga kottha.
9:15 Dhari jadhiya kabudhuwan jareya lok-ologan ka reng-oreng se lebat. Reng-oreng se berse atena ecacae,
9:16 “Mara nyepper dha’ enna’, kabbi se gi’ ta’ andhi’ pangalaman!” Ban ka reng-oreng se ta’ andhi’ akkal buddi ngoca’ kantha reya,
9:17 “Aeng ollena ngeco’ rassana manes, ban roti se ekakan tek-ngetek anyamanan rassana.”
9:18 Reng-oreng se daddi mangsana ta’ tao ja’ reng-oreng se entar ka jadhiya mate e jadhiya; ban reng-oreng se la maso’ ka bengkona, sateya badha e dunnyana oreng mate.